2 years ago
नेपाल कम्युनिष्ट पार्टी(नेकपा)का अध्यक्ष पुष्प कमल दाहाल प्रचण्डले पार्टीभित्रको बहस, विधि पद्धतीका लागि मात्र भएको बताउनु भएको छ ।
शनिबार पार्टी कार्यालय धुम्वाराहीमा कांग्रेसका पूर्व सांसद कौसर शाहलाई नेकपा प्रवेश गराउदै प्रचण्डले अवको समाजवादको यात्रामा अघि बढ्न सन्दर्भमा कस्तो आर्थिक नीति हुने, कस्तो राजनीतिक मान्यताहरुलाई अवलम्वन गर्दै जाने र कस्तो आचार संहितालाई पालन गर्ने भन्ने बहस मात्र भएको बताउनु भएको हो ।
उहाले विधि विधान र पद्धतीलाई स्थापित गर्न पार्टी भित्र हुने बहस स्वभाविक मात्र भएको उल्लेख गर्नुभयो । संविधानले समाजवाद उन्मुख राज्यको परिकल्पना गरेको भन्दै प्रचण्डले समाजवाद उन्मुख राज्य निर्माणको दायित्व पनि कम्युनिष्ट पार्टीको नै भएको धारणा राख्नुभयो ।
प्रचण्डले गणतन्त्रलाइ रक्षा र सुदृढ गर्ने र यो प्रणाली मार्फत मुलुकको आर्थिक विकासको यात्रा तय गरिने भन्दै यसमा चूनौति सामना गर्ने तागत कम्युनिष्ट पार्टीभित्र मात्र रहेको बताउनु भयो । त्यस्तै नेकपा नेता माधव कुमार नेपालले नेकपाप्रति जनताको विश्वास बढ्दै गएको बताउनु भयो ।
पार्टी प्रवेश गर्दै शाहले कांग्रेसको नेतृत्व असक्षम तथा विचार विहीन भएकाले आफूहरुले कांग्रेस पार्टी परित्याग गरेको बताउनु भयो । कांग्रेसले बीपीको विचारलाई पार्टी सिद्धान्त बनाउन नसकेको उहाको आरोप छ ।
उहाले कांग्रेसमा गुट–उपगुट रहे पनि एकजुट बनाउन नसकेको आरोप पनि लगाउनु भयो । शाह दोस्रो संविधान सभा निर्वाचन २०७० मा कांग्रेसको तर्फबाट मुस्लिम कोटामा सांसद बन्नुभएको थियो । उहासंगै १०९ जना नेपाल कम्युनिस्ट पार्टी (नेकपा)मा प्रवेश गरेका थिए ।
