2 years ago
प्रतिनिधिसभा अन्तर्गतको शिक्षा तथा स्वास्थ्य समिति अन्तर्गतको कोभिड १९ को सम्बन्धमा सरकारले गरेका कामकारवाहीका बारेमा अनुगमन गर्न गठित उपसमितिले कोरोना संक्रमितको उपचार गरिरहेका विभिन्न अस्पतालको अनुगमन गरेको छ ।
मंगलबार उपसमितिका संयोजक जीवनराम श्रेष्ठको नेतृत्वको टोलीले काठमाडौंको महाराजगंजस्थित प्रहरी अस्पताल, आर्मीको सैनिक अस्पताल र वीर अस्पतालको अनुगमन गरेको हो ।
अनुगमनका क्रममा प्रहरीको अस्पतालमा २ सय ६४ जना कोरोना संक्रमितको उपचार भईरहेको पाइएको उपसमिति संयोजक श्रेष्ठले बताउनुभयो ।
उक्त कोरोना संक्रमितको उपचारका लागि दुई सय बेड थप्न सकिने देखिएकाले छलफल चलाइएको उहाँले बताउनुभयो । त्यस्तै आर्मीको अस्पतालमा सय बेडमा कोरोना संक्रमितको उपचार भइरहेको र आर्मीले अन्य स्थानमा पनि संक्रमितको उपचार गरिरहेको पाइएको तथा उपचार सन्तोषजनक पाइएको छ भने कोरोना संक्रमितको उपचारका लागि तयारी गरिएको वीरको नयाँ भवनको पनि अनुगमन गरिएको उपसमिति संयोजक श्रेष्ठले बताउनुभयो ।
उहाँले विभिन्न अस्पतालमा कोरोना संक्रमितको उपचारका लागि बेड थप गर्नका लागि सरकारका सम्बन्धित मन्त्रालयसंग छलफल गरिने बताउनुभयो ।
